Escrow haituzuii watu wa mpira kujadili yetu

Joseph Kapinga 

Sakata la escrow halijakwisha. Limetulia kusubiri utekelezaji wa mapendekezo ya Bunge. Wakati utekelezaji huo ukisubiriwa kwa hamu, kuna jambo moja linasumbua.Je, mapendekezo yote yatatekelezwa? Swali hili linasumbua kwa sababu, siyo mapendekezo yote yanayotolewa na Bunge huwa yanatekelezwa na Serikali. Kuna wakati Bunge lilipendekeza watoswe ‘wanene’ fulani serikalini, lakini hatima yao haijajulikana hadi kesho.Sasa tunasikilizia, nani atang’oka kama mapendekezo ya Bunge yanavyotaka. Bunge limependekeza watu wa kutoswa kutokana na kashfa hiyo ya mabilioni ya fedha. Hakuna anayejua, labda mkuu wa nchi peke yake. Ndiye anasubiriwa.

Nilipata wakati mgumu sana mwanangu aliponiuliza hivi karibuni kuhusu suala la escrow. Aliniuliza: “Mara nyingi nasikia unazungumza na wenzako ‘eskroo’ ndiyo kitu gani? Hata kwenye televisheni nasikia sana wanaongelea.”

Kwa utoto wake, sikuwa na jibu lenye maelezo ambayo yangemfanya kujua kwa undani suala hilo. Tuliachana hapo. Umaarufu wa sakata la escrow ni mkubwa kuliko maelezo. Hata hivyo, pamoja na sakata hilo kushika hatamu kila sehemu ya nchi, bado watu wa mpira tuna mambo yetu ya kuzungumza kila wiki.

Nimesikia eti klabu za Simba na Yanga zinaua vipaji vya wachezaji chipukizi.

Kwa haraka haraka, unaweza kutoa jibu jepesi kwamba ni kweli klabu hizo zinafanya hivyo.

Mimi nisingependa kuwa na jibu jepesi kiasi hicho, nikiamini kwamba hata wachezaji chipukizi wenyewe wamekuwa sehemu ya kuua vipaji vyao.

Sababu ni moja tu. Ndoto za chipukizi katika soka la Bongo ni kucheza Simba au Yanga. Vijana wetu wamejaa utamaduni unaowafunga kuwa na ndoto za mbali zaidi ya kucheza Simba na Yanga, ambako wakienda huko huishia kusugua benchi.

Mfano, Nonda Shaban aliichezea Yanga, lakini dhamira yake haikuwa kubaki Tanzania bali kucheza kwa kiwango cha juu zaidi. Alifanikiwa.

Mshambuliaji mpya wa Simba, Danny Sserunkuma nimemsikia akisema kuwa amejiunga na Simba ili kupata fursa ya kutimiza ndoto yake kucheza soka la kulipwa Ulaya. Tujiulize ni wachezaji chipukizi wangapi wa Tanzania wenye ndoto za kucheza soka la kimataifa zaidi ya Simba na Yanga?

Tunaweza kuzilaumu klabu hizi kuwa sehemu ya kuua vipaji vya vijana wetu, pia tuangalie upande wa pili ambao ni utayari wa ndoto za chipukizi hao kucheza soka la kimataifa